Home Loan : કેન્દ્ર સરકારે પ્રધાનમંત્રી આવાસ યોજના-શહેરી (PMAY-U) 2.0ને મંજૂરી આપી છે. આ હેઠળ શહેરી ગરીબ અને મધ્યમ વર્ગના પરિવારો માટે 1 કરોડ મકાનો બનાવવાના છે. આ 1 કરોડ પરિવારોને 2.30 લાખ કરોડ રૂપિયાની સરકારી સબસિડી આપવામાં આવશે. આ સબસિડી અલગ અલગ રીતે આપવામાં આવશે. આવી જ એક પદ્ધતિ વ્યાજ સબસિડી યોજનાની છે. તો ચાલો જાણીએ, આ યોજના વિશે.
યોજનાના દાયરામાં કયા લોકો આવશે
આર્થિક રીતે નબળા વર્ગ (EWS)/ઓછી આવક જૂથ (LIG)/મધ્યમ આવક જૂથ (MIG) પરિવારો આ યોજના હેઠળ આવે છે. આ એવા પરિવારો છે જેમની પાસે દેશમાં ક્યાંય પણ પોતાનું કોઈ કાયમી ઘર નથી. આવા લોકો PMAY-U 2.0 હેઠળ મકાન ખરીદવા અથવા બાંધવા માટે પાત્ર હશે.
EWS ના દાયરામાં : ₹3 લાખ સુધીની વાર્ષિક આવક ધરાવતા પરિવારો
LIG હેઠળ : ₹3 લાખથી ₹6 લાખની વચ્ચે વાર્ષિક આવક ધરાવતા પરિવારો
MIG હેઠળ : ₹6 લાખથી ₹9 લાખની વચ્ચે વાર્ષિક આવક ધરાવતા પરિવારો
વ્યાજ સબસિડી યોજના
EWS, LIG અને MIG પરિવારો માટે હોમ લોન પર સબસિડી આપવામાં આવશે. ₹35 લાખ સુધીના મકાનો માટે ₹25 લાખ સુધીની હોમ લોન લેનારા લાભાર્થીઓ 12 વર્ષ સુધીના સમયગાળા માટે પ્રથમ ₹8 લાખની લોન પર 4 ટકા વ્યાજ સબસિડી માટે પાત્ર બનશે. 5-વાર્ષિક હપ્તાઓમાં પુશ બટન દ્વારા પાત્ર લાભાર્થીઓને ₹1.80 લાખની સબસિડી આપવામાં આવશે. લાભાર્થીઓ વેબસાઇટ, OTP અથવા સ્માર્ટ કાર્ડ દ્વારા તેમના ખાતાની માહિતી મેળવી શકે છે.
તમને જણાવી દઇએ કે, પ્રધાનમંત્રી આવાસ યોજના – શહેરીને વર્ષ 2015 માં શરૂ કરવામાં આવી હતી. આ યોજના હેઠળ 1.18 કરોડ આવસોને મંજૂરી આપવામાં આવી હતી, જેમાંથી 85.5 લાખથી વધારે આવાસ પૂર્ણ કરીને લાભાર્થીઓને આપવામાં આવ્યા છે અને બાકી આવાસનું બાંધકામ ચાલી રહ્યું છે.