શ્રદ્ધા કપૂર અને રાજકુમાર રાવ અભિનીત ફિલ્મ ‘Stree 2’ નો બોક્સ ઓફિસ પર ધમાલ જોવા મળી રહ્યો છે. તે 2024 ની અત્યાર સુધીની સૌથી વધુ કમાણી કરનારી ફિલ્મ બની ગઈ છે. તેણે કમાણીના મામલામાં ઘણી બ્લોકબસ્ટર ફિલ્મોને પાછળ છોડી દીધી છે. રિલીઝના આટલા દિવસો પછી પણ તે સિનેમાઘરોમાં તેની પકડ જાળવી રાખેલ છે. ફિલ્મ દ્વારા રિલીઝ ના 39મા દિવસે પણ બોક્સ ઓફિસ પર પોતાની પકડ જાળવી રાખી છે. 39 માં દિવસે અમર કૌશિક દ્વારા નિર્દેશિત આ ફિલ્મના ઘરેલુ બોક્સ ઓફિસ કલેક્શનમાં વધારો જોવા મળ્યો છે.
માત્ર 60 કરોડ રૂપિયાના બજેટમાં બનેલી મેડોક સુપરનેચરલ યુનિવર્સ ની આ ફિલ્મ દ્વારા ઈતિહાસ રચવામાં આવ્યો છે. આ હિન્દીની સૌથી વધુ કમાણી કરનાર હોરર-કોમેડી ફિલ્મ બની ગઈ છે. એટલું જ નહીં, ‘એનિમલ’, ‘પઠાણ’ અને ‘ગદર 2’ જેવી ફિલ્મોને પાછળ છોડી તે ભારતની સૌથી વધુ કમાણી કરનારી હિન્દી ફિલ્મ બનવાના માર્ગ પર રહેલી છે.
15 મી ઓગસ્ટના સ્વતંત્રતા દિવસના અવસર પર રિલીઝ થયેલી આ ફિલ્મ દ્વારા શરૂઆતના દિવસે જ બમ્પર ઓપનિંગ કરવામાં આવી હતી. આ ફિલ્મ દ્વારા પ્રી-પેઇડ પ્રીવ્યૂમાં 8.5 કરોડ રૂપિયા અને પ્રથમ દિવસે 51.8 કરોડ રૂપિયાનો બિઝનેસ કરવામાં આવ્યો હતો. તેની સાથે ફિલ્મે પહેલા અઠવાડિયામાં 291.65 કરોડ રૂપિયાની કમાણી કરી હતી. ‘સ્ત્રી 2’ એ બીજા અઠવાડિયામાં પણ તેનું ઉત્તમ પ્રદર્શન ચાલુ રાખ્યું હતું. રિલીઝના બીજા અઠવાડિયે તેના દ્વારા 141.4 કરોડ રૂપિયાની કમાણી કરવામાં આવી હતી.
મેડોક સુપરનેચરુલ યુનિવર્સની આ ફિલ્મે ત્રીજા અઠવાડિયામાં 70.2 કરોડ રૂપિયાનું કલેક્શન કર્યું હતું. ચોથા અઠવાડિયામાં તેની કમાણી 36.1 કરોડ રૂપિયા રહી હતી. પાંચમા અઠવાડિયામાં તેણે 24.65 કરોડ રૂપિયાનો બિઝનેસ કર્યો હતો. માત્ર 60 કરોડના બજેટમાં બનેલી આ ફિલ્મ દ્વારા 37 માં દિવસે 5 કરોડનો બિઝનેસ કરવામાં આવ્યો હતો. તેણે તેની રિલીઝના 38 મા દિવસે રૂ. 3.65 કરોડનું કલેક્શન કર્યું હતું અને તેની કુલ કમાણી રૂ. 572.65 કરોડ પહોંચી ગઈ હતી.
પ્રારંભિક આંકડાઓ મુજબ, ‘Stree 2’ એ તેના રિલીઝના 39 માં દિવસે 4.44 કરોડ રૂપિયાનું કલેક્શન કર્યું છે, જેના લીધે અત્યાર સુધીમાં તેનો કુલ બિઝનેસ 577.09 રૂપિયા પર પહોંચી ગયેલ છે. ‘સ્ત્રી 2’ને ટક્કર આપવા માટે તાજેતરના સમયમાં કોઈ મોટી રિલીઝ થઈ નથી. કરીના કપૂર ખાન અભિનીત ફિલ્મ ‘ધ બકિંગહામ મર્ડર્સ’ તેમજ ‘તુમ્બાડ’ પણ ફરીથી રિલીઝ કરવામાં આવેલ છે. તેમ છતાં બંને ફિલ્મોની ‘સ્ત્રી 2’ની કમાણી પર કોઈ અસર પડી નથી.